BJP hruaituin FIFA World Cup boycott turin ngen

BJP thupuangtu, Savio Rodrigues chuan Qatar-a FIFA World Cup neih mekah Islamic preacher Zakir Naik sawm tel a nih avangin sorkar laipui, Indian Football Association leh India mipuite chu World Cup boycott turin a ngen.

Zakir Naik hi World Cup neih lai hian Islam sakhaw chungchanga zirtirna pe tura sawm tel nia sawi a ni. Hemi chungchangah hian Rodrigues chuan thuchhuah siamin, khawvelin firfiak zawnga chetna huaa a dodal mek laiin, firfiakte khawngaihtu leh inhuatna lam thu thehdarh ṭhintu chu thusawina hun pek a ni, a ti. "FIFA World Cup chu khawvel huap event a ni a, khawvel ram hrang hrang aṭangin inkhel en turin an kal a, TV leh internet lamah pawh mi maktaduai telin an en ṭhin bawk. Khawvelin firfiaka chetna a hua a, a do let mek. Hetih lai hian inhuatna lam leh inpumkhatna tihchhiatna thu sawi ṭhintu chu thusawina hun pek a ni thung a ni," a ti.

BJP hruaitu chuan India ram mipuite leh, ram danga firfiaka chetna tuartu ramte chu World Cup hi boycott turin a sawm.

Naik chu India rama Islam firkfiak taka kalpui leh sakhaw dangte huatna thehdarhtu a ni tiin, Rodrigues chuan, "Firfiakte aia a danglamna hran a awm lo," a ti. Indian law hnuaia man tuma zawn mek niin, langsar taka Osama bin Laden thlawptu a ni tiin a sawi.

Kumin March thla khan Home Ministry chuan Zakir Naik-a din, Islamic Research Foundation (IRF) chu dan kalha din tiin kum nga chhung atan dan pawnah a lo hnawl tawh bawk a ni. Ministry thuchhuah chuan Zakir hi Islam sakhuaa inlehluih tirnaah te, thihchilh bomb tihpuahna tur hmun thlanah te, Hindu leh Hindu pathiante sawichhiatna thu post-naah te a inrawlh fo niin a tarlang.