26/11 Mumbai beihnaa thite hriatrengna hun hmang

Nimin kha kum 2008-a Pakistan firfiakten Mumbai khawpui an beih champha a ni a, mi hrang hrangte firfiakte pawikhawihna thlena thite hriatrengna hun an hmang.

Prime Minister Narendra Modi chuan thla tina radio-a programme a hun hman, Maan Ki Baat-ah pawh hemi chungchang hi sawichhuakin, 26/11-a pawikhawihna thlenga thite chu ramin a hriatreng thu a sawi a, firfiaka chetna do let tura khawvel ram hrang hrangte an inlungrual a ngaih thu a sawi bawk. PM chuan, "26/11-a Mumbai beih a nih ṭuma thi mi huaisente zahna kan hlan a ni. India chuan hun rei tak chhung chu firfiakte chetna chugchang hi a lo buaipui tawh ṭhin a, khawvelin kan thusawi hi la thutak lo ṭhin mah se, tunah chuan firfiakte chetna in pawikhawina a thlen nasat theih zia an hrethiam tawh a ni", a ti.

President Ram Nath Kovind pawhin firfiakten Mumbai khawpui an beih laia mipuite nunna chhan tuma beitu, security force te zinga nunna chan tate zahna a hlan. President chuan firfiakte kuta thi chhungte chu ramin a tuarpui thu a sawilang bawk.

Congress vice president Rahul Gndhi pawhin social media lamah 26/11 pawikhawihna thleng tuartute a tawrhpui thu a tarlang bawk a ni.

Maharashtra Governor C Vidyasagar Rao, Chief Minister Devendra Fadnavis leh state minister ṭhenkhatte pawhin nimin zing khan firfiakte an beihletnaa thi, police officer-te hriatrengna hmun siam, South Mumbai-ah zahna hlanin pangpar an dah bawk.

Kum 2008, November 26-a Pakistan firfiakten Mumbai khawpui an beihnaah khan mi 166 an thi a, an zingah hian police officer 18 leh NGC commando pahnih an tel a ni.