VHP hotu-in Ram temple sak hun tur puang

Vishwa Hindu Parishad (VHP) international joint secretary, Surendra Kumar Jain chuan Ram temple sak hna chu nakkum October thla aṭangin ṭan a ni dawn tih a sawi.

Karnataka-a Dharma Sansad-a thu a sawinaah hei hi sawichhuakin Jain chuan, "Kum 2018, October thla aṭangin Ram temple hi sak ṭan a ni dawn a, Dharma Sansad dawt leh chu Ayodhya-ah neih a ni tawh ang", a ti. Hindu temple-a rorel hna chu Hindu-te chauh kutah a awm tur a ni, a ti bawk.

Hemi hma hian RSS hotu Mohan Bhahwawt pawhin Ayodhya-ah chuan Ram temple chauh a awm tur a ni tiin a lo sawi tawh bawk.

Hindu sakhaw hruaitute intawhkhawmna, ni thum awh Dharma Sansad hi VHP huaihawt a ni a, nimin thleng khan hman a ni. He hunah hian Hindu hruaitu hrang hrangte chuan thu an sawi a, thusawitu zinga pakhat Swami Govind Dev Giri chuan Hindu nupa te chu fa pali tal nei turin a chah bawk. Giri chuan Hindu tlemna apiangah India chuan a ram a lo chan tawh ṭhin tih an hmuh aṭangin, fa pahnih neihna tur policy siam chu Hindu-te tan thlahdul a ngai nia a hriat thu a sawi.