Russia-ah Rajnath Singh a zin

Union Home Minister Rajnath Singh chu ni thum cham turin nimin khan Russia-ah a zin.

Russia-a Rajnath Singh a cham chhungin, ram pahnihte hian firfiakte chetna do letna leh, ruihho tawlhruk ṭhin venna kawnga thawhdunna tur inremna pahnih an ziak dawn an ni. He inremna hmang hian ram pahnihte chuan an hmalakna kawngah information pawimawhte an inhrilhtawn ang a, security lama thawhdunna nghet zawk an siam dawn niin home ministry official chuan a sawi.

Home minister hian Russia minister for internal affairs Vladimir Kolokilstev bakah hruaitu dangte a kawm bawk ang.

Russia pana a chhuah hmaa chanchinthar lakhawmtute a kawmnaah, Rajnath Singh chuan India leh Russia chuan inlaichinna ṭha tak an neih thu a sawi a, kumin hi ram pahnihte hian palai an intirhtawnna champha kum 70 na a nih thu a sawi. Russia nena inlaichinna nghet leh thuk zawk siam chu an nghakhlel hle tih a sawi bawk.

Home minister hi kumin September 18 khan Russia-a zin tur hi a ni a, mahse hemi ni hian firfiakten Jammu and Kashmir-a Biraged headquaters an beih avangin a zin tur hi a ṭhulh a ni. Firfiakte pawikhawihnaah hian sipai 19 an thi a, firfiak pali-te chu kahhlum an ni bawk.