Haryana-ah nawrh huaihawt

Haryana-ah Jat hnamin sorkar hna leh zirna lamah quota pek phutin nawrh an huaihawt.

Jat-ten nawrh an huaihawt dawn vang hian state chhunga district 13-ah mobile internet servie tihtawp a ni a, dan leh thupek kengkawh turin paramilitary force company 25 dah an ni bawk.

Jat hnamten quota pek phuta nawrh an huaihawt lai hian, Kurukshetra bialtu BJP MP, Raj Kumar Saini chuan Jat hnam tan reservation pek duh lohin dodalna inkhawm, 'Samaanta Maha Sammelan' chu Jind-ah a buatsaih ve bawk.

All India Jat Arakashan Sangharsh Samiti hotu Yashpal Malik chuan Rohtak district-a Jassia khuaah rally hi neih a nih tur thu a sawi a, hei vang hian boruak ṭha lo chhuak tur vengin Rohtak-ah hian security force 3,500 dah luh nghal an ni. Kar kalta Zirtawpni khan Jat mi ṭhenkhat, BJP MP huaihawta Jind-a pun khawmna tur dodaltute chu police-te nen an innawr buai a, Jind leh Chandigarh inkar kawngpui, National Highway chu khar a ngaih phah a ni. Police-te chuan pungkhawmte hi tiang hmangin an hnawhdarh a, hemi hnuah kawngpui hi hawn leh a ni. Jat hruaitu, Sandeep Bharti-a chuan MP Raj Kumar Saini-a chu Jat quota dodalna inkhawm a siam tum ṭhulh turin a phut a, Saini-a hi Jat hnam do hrim hrim nia sawiin, hnam leh hnam rawng kai zawnga mipui chawk tho zawnga thu sawi chingah a puh bawk.