Pawngsualtute thi tura hremna pekna tur bill siam

Madhya Pradesh sorkar chuan hmeichhe naupang, kum 12 leh a hnuai lam pawngsualtute thi tura hremna pekna tur bill a duang a, he bill hi nimin aṭanga neih ṭan assembly thlasik ṭhutkhawmah pharh a ni dawn.

He bill hi Public Safety Bill tih a ni a, Pathianni khan cabinet chuan hmeichhe naupang kum 12 leh a hnuailam pawngsualtute thi tura hremna pekna tur hi a lo pawm tawh a ni.

Chief Minister Shivraj Singh Chouhan chuan hmeichhe naupangte himna turin dan tihchak a nih tur thu a sawi a, mipa naupangte chunga mawi lo taka chete hremna pawh la siam zel tum a nih thu a sawi.

Finance Minister Jayant Malaiya chuan hmeichhe naupang pawngsualtute thi tura hremna pek a nih theihna tur hian Indian Penal Code (IPC) section chu siamṭhat a ngai tih a sawi. IPC siamṭhat a nih hunah chuan, pawngsualtute chu IPC section 376AA leh 376 DA hnuaiah thubuai siamsak an ni thei dawn a ni, a ti.

Cabinet meeting chuan hmeichhiate chunga pawikhawihna thleng ṭhin pawh dang tura chak zawka hma lak an rel dawn. Malaiya chuan mipa-in nupuia neih tum chhuanlam hmanga hmeichhia a pawngsual a, hmeichhiain complaint a thehlut a nih chuan thil sual titu chu IPC section 493(a) hnuaiah thubuai siamsak theih a nih tur thu a sawi. Hmeichhe naupang zui rua mante chu cheng nuai khat thleng chawitir theih an ni dawn a, an tinawn leh a nih chuan IPC section 110 hnuaiah bail theih loha man theih an ni ang, tiin minister chuan a sawi.

Madhya Pradesh hi ramchhunga state zinga mipat hmeichhiat lam hawia pawikhawihna thlen nasatna ber a ni. National Crime Record Bureau (NCRB) 2016 record-a a lan danin, kum 2015 khan MP-ah hian pawngsual thubuai 4,391 a awm a, a dawttu Maharashtra-ah chuan pawngsual thubuai 4,144 a awm bawk. Naupang kum tlinglote mipat hmeichhiat lam hawia khawihna thubuai chu kum 2015-ah MP-ah hian 1,687 a awm bawk.