Aadhaar chungchang ngaihtuah dawn

Supreme Court chuan sorkar laipuiin service hrang hrang atana mipuiten Aadhaar an neih ngei a ngai tia a sawi chungchang khinletna petition eng emaw zat lut chu a ngaihtuah dawn.

Sorkar laipui chuan welfare scheme hrang hranga hamṭhatna dawng turin Aadhaar hi neih ngei a ngai tih a lo sawi tawh a, mahse Aadhaar leh scheme hrang hrangte thlunzawmna tura hun tiam chu nakkum March 31 thleng pawhsei a inhuam thu Chief Justice Dipak Misra a hrilh.

Aadhaar petition ngaihtuahtu tur bench hi Chief Justice Dipak Misra-an hoin, Justice AM Khanwilkar leh Justice DY Chandrachud te an tel dawn a, hemi chungchangah hian interim order an pass nghal dawn bawk a ni.

Petition thehlut-tute chuan sorkar laipuiin welfare scheme hnuaia hamṭhatna dawng turte tan Aadhaar neih ngei ngei ngai nia sorkarin a sawi chu dansak turin an ngen a ni.

October 30 khan CJI kaih-hruai bench chuan Aadhaar leh a kaihhnawih thil hrang hrangte ngaihtuah tur hian constitution bench din anih tur thu a lo sawi tawh a ni. November 13 khan mobile number leh Aadhaar thlunzawm tura tih chungchang petition lutte chu a ngaihtuah dawn hrih lo tih sawiin, aadhaar kaihhnawih dang petition tam tak tihkhawtlai mek a la awm thu a sawi.

SC hian November 3 khan bank leh telecom service provider-te hnenah bank account leh mobile number leh Aadhaar thlunzawm tur hun tiam chin tichiang turin a lo ti tawh a ni. Tuna ruahmanna kalpui mekah chuan bank account leh Aadhaar thlunzawm hun hi kumin December 31 thleng niin, mobile number nena thlunzawm hun chu nakkum February 6 thleng tih a ni.