Jaya-a fanu-a inchhalin DNA test phut

Bengaluru-a hmeichhe pakhat chu Tamil Nadu chief minister hlui, J Jayalalithaa-i fanu niin a inchhal.

Jaya-i fanu ni a inchhal hi Amrutha, Manjula tih bawk a ni a, kum 37 mi a ni. Supreme Court-ah petition thehlutin, Jaya-i fanu a ni ngei tih finfiah nana DNA test neih phalsak turin a dil a, hei bakah hian Jaya-i ruang chu Hindu Iyengar hnam dan anga halral a phut bawk.

Amrutha chuan Jaya-i u, Shylaja leh a pasal Sarathy-ten Bengaluru-ah an enkawl seilian niin a sawi a, Sarathy hian March thlaa a thih hma lawkin Jaya-i fanu a ni tih hi a hrilh tih a sawi. Jaya-i fanu a nih thu hi a hma pawhin sawichhuah alo tum tawh a, mahse Jaya-i thawhpui VK Sasikala-i thlawptute chuan an lo dang niin a sawi bawk.

Supreme Court-a petition a thehluhah, Amrutha chuan Jaya-i chhungte chuan Jaya-i hmingchhiat hlauh vang leh, chhungkaw zahawmna vawn nun duhin a fanu tih hi an zep niin a sawi. Kum 1980, August 14 khan Chennai-a Jaya-i chenna ina piang a nih thu a sawi.

Amrutha chuan Apollo Hospital-a Jaya-i a awm lai pawh khan hmuh tumin ṭum li a kal a, mahse Sasikala-i thupek angin security te chuan lo dang zel tih a sawi bawk.