PM-in Hyderabad Metro Rail a hawng

Prime Minister Narendra Modi chuan nimin khan Hyderabad Metro Rail a hawng.

Km 30-a thui, Miyapur leh Nagole inkara metro rail project-ah hian station 25 a awm a, PM Modi chuan nimin tlai dar 2:15 khan Miyapur station aṭangin a hawng a, vawiin aṭangin tlan ṭan tir a ni ang.

Metro Rail hawn a nih hnu hian tlan tir chhin niin, Modi leh Telangana Chief Minister K Chandrasekhar Rao te chu Miyapur aṭanga Kukatpally thleng an chuang a, an kir leh nghal a ni. He rel hi zing dar 6 leh zan dar 10 ah a tlanchhuak ṭhin dawn a, traffic leh mipuite lam mamawh dan azirin a tlan hun hi siam danglam theih a ni dawn niin Telagana Information Technolgy Minister KT Rama Rao chuan a sawi.

He project hi kum 2012 July thla aṭang khan thawh ṭan a ni a, June thla khan zawhfel hman tura ruahman ni mah se, ram hman tur leh thil dangah harsatna a awm avangin a zawh hun hi a khawtlai phah a ni.

Hyderabad Metro Rail Ltd (HMRL) chuan Miyapur-Nagore inkarah station ven hna chu private agency hnuaia mi 546 ten an thawk dawn tih sawiin, station tinah police official pathum kaihhruaina hnuaiah an thawk dawn a ni.