US President Donald Trump-a fanu leh a adviser, Ivanka Trump chu Hyderabad-a Global Entrepreneurship Summit 2017 hmang turin nimin zing khan a rawn thleng. 
Global Entrepreneurship Summit hi India leh US sorkar buatsaih a ni a, South East Asia-a an vawi khat buatsaihna a ni. Ni thum awh tur, summit theme atan hian 'Women First, Prosperity for All' tih hman a ni a, summit chhunga hmeichhe thusawi tura ruat zingah hian tennis player Sania Mirza, Google Vice President Diana Louise Patricia Layfield, Afghan Citadel Software Company CEO Roya Mahboob-te an tel. 
Prime Minister Narendra Modi chuan US a zin ṭumin summit-a tel tur hian Ivanka Trump hi a lo sawm tawh a ni. Ivanka Trump hi palai 350 velin an rawn zui a, an zingah hian administration official te an tel a, Indian-American eng emaw zat an tel bawk. He summit-ah hian entrepreneur 1,200 vel an tel beisei a ni a, an zinga a tam zawk chu hmeichhia an ni ang. Summit-a tel tur zingah naupang ber chu kum 13 mi a nih thu official-te chuan an sawi. 
Nimina summit hawnnaah Ivanka leh PM Modi-te chuan thu an sawi a, hemi hnu hian Ivanka leh Defence Minister Nirmala Sitharaman-te chu panel discussion-ah an tel leh a ni. Ivanka hian vawiina session neih turah thu a sawi leh bawk ang. 
Nimin tlai khan PM chuan Ivanka Trump tan hian Hyderabad-a Falaknuma Palace-ah zanriah a buatsaih sak a ni.