PM leh CM-ten meeting nei India ramah hri kai 67,152 an awm tawh

Prime minister Narendra Modi chuan nimin khan video conference hmangin state leh union territory chief minister-te meeting a neih pui leh a, May 17-a lockdown a zawh hnuah kalphung turte an sawiho. 

Nimina meeting hi coro­novirus leng vanga lockdown puan hnua PM-in chief minis­ter-te meeting a neihpui ṭum ngana a ni. Meeting hmasa te ang loin chief minister-te chu an vaiin thu sawina hun hawn sak vek an ni a, union territory-te chu an ngaihdan ziaka thehlut tura tih an ni bawk. 

Prime minister Modi chuan India-in hri leng dona tura a hmalak dan chu khawvel pawhin a hlawhtling hle nia an ngaih thu sawiin, hemi kawngah hian state sorkarte chuan an mawhphurhna te hriain, an tih tur te ṭha takin an ti thei a ni, a ti. Mipuite chu an awmna hmun sawn lo turin duh hrih mah se, mahni khaw lama haw an chak chu mihring nihphung ve reng a nih vangin, thutlukna an lo siam tawhte pawh thlak danglam a ngai ta a ni, tiin inhlawh­­faa awmte hruai haw an nih chungchang a sawi. 

Hemi rual hian hri hi a darh zel lohna tura theihtawp chhuah chu state tin tana chona lian tak a nih thu sawi bawk. 

Union home minister Amit Shah pawh meeting-naah hian telin, Aarogya Setu mobile application pawimawhna te a sawi a, CM-te hnenah hri darh dan chhuina kawnga a puih dawn vangin an state-ah pawh he apps hi sawilar turin a chah. 

Chief minister-te chuan March thla tawp lam aṭanga ram puma lockdown hman a nih avanga hmun danga tangkhang, a bikin inhlawhfaa awmte tawh chungchangte an sawichhuak hlawm. Economic package siam an duh thute an sawi bawk. 

India ramah Covid-19 darh zel tur laka invenna atan hun eng emaw chen kharkhipna kalpui a ni tawh a, heti chung hian nitin hri kai thar an pun belh reng thung. 

Pathianni khan ram chhungah hri kai thar hi mi 4,213 an awm a, ni khata hri kai thar tam ber ṭum a ni leh.  

Union health ministry-in a tarlan danin, nimin thleng khan ram pumah hri kai hmuh tawh zat chu mi 67,152 an tling tawh. Heng zinga 20,916 chu enkawl dam an ni tawh a, enkawl mek mi 44,029 an awm. Hri kai zinga mi 2,206 an thi tawh a, Pathianni khan  mi 97 in an thihpui a ni. 

Hri kai zingah parliamilitary force sipai 532 an awm tawh a, heng zingah hian BSF aṭangin mi 223, CRPF 162, ITBP 82, CISF 48 leh SSB sipai 17 te an awm.