Parliament session neihna tur hmun Speaker kutah awm

Union minister of state for housing and urban affairs Kaushal Kishore chuan Parliament building thar chu zawhfel a ni dawn hnai tih a sawi a, hetih lai hian Parliament Winter Session chu building thar nge building hluiah neih a nih dawn tih chu Lok Sabha Speaker kutah a awm tih a sawi.

Parliament Winter Session hi December 7 aṭangin neih ṭan a ni dawn a, December 29 thleng a awh ang.

Sorkar laipui chuan November thla hian Parliament building thar chu peihfel a ni hman dawn niin a sawi a ni.

Kum 2020, December thla khan prime minister Narendra Modi chuan Parliament building thar sakna tur lungphum hi a phum a, Tata Projects Ltd-in a thawk a ni. Building tharah hian facility tunlai tak takte dah a ni dawn, Constitution Hall lian tak bakah, Parliament member-te tan lounge siam a ni dawn a, library, committee room eng emaw zat, dining area leh parking space lian tak siam a ni dawn bawk.

Parliament building thar hi Central Vista redevelopment project hnuaiah thawh a ni a, he project hnuaiah vek hian Prime Minister Office, Cabinet Secretariat, India House leh National Security Council Secretariat-te sak a ni bawk ang.

Ram chhunga Covid-19 hri leng a ziaawm tawh avang leh, Parliament in hnih member-te leh Secretariat staff tam zawkten vaccine an lak tawh avangin tun ṭum session-ah hian hri leng vanga khuahkhirhna dan siam tam zawkte chu hman a ni tawh lo ang. Tun ṭum session hi India ram vice president leh Rajya Sabha chairman, Jagdeep Dhankar-a'n thlan tlin a nih hnua rorel inkhawm a kaihhruaina hmasa ber tur a ni.