Bharat Jodo Yatra-in Madhya Pradesh lut

Congress party hruaitu Rahul Gandhi hoa Bharat Jodo Yatra neih chuan nimin khan Maharashtra aṭangin Madhya Pradesh state an lut a, MP-ah ni 12 chhung an kal leh ang.

Maharashtra Congress chief Nana Patole chuan nimin khan yatra flag chu MP-a Congress hruaitu Kamal Nath kutah a hlan chhawng a ni. Flag inhlanchhawnnaah hian MP Assembly-a leader of opposition ni mek, Govind Singh pawh a tel .

Rahul Gandhi chuan yatra a neih mek chu ram chhunga inhuatna, tharum thawhna leh hlauhthawnna awm mek dodalna a nih thu sawiin, Srinagar thleng an kal turah tumah an dang thei lo tih a sawi.

Madhya Pradesh-a Rahul Gandhi ho hian yatra hi ni 12 neih a ni dawn a, nimin khan Burhanpur district-a St Xavier International School Jainabad Fata aṭangin an kal ṭan leh nghal a ni. Rahul-a farnu, Congress hruaitu Priyanka Gandhi Vadra leh a chhungte ṭhenkhat pawhin nimin tlai lam khan yatra hi an zawm ve a, Burhanpur aṭanga Indore thleng a kal ve a ni.