Rahul-a'n PM CARES Fund audit a duh

Congress hruaitu Rahul Gandhi chuan Prime Minister Citizen Assistance and Relief in Emergency Situations (PM CARES) Fund chu audit a duh thu a sawi. 

March 28 khan PM CARES Fund hi sorkar laipui chuan a din a, ramchhunga Covid-19 dona atana tih a ni. He fund hi India rama sum che vel audit tu, Comptroller and Auditor General of India (CAG) chuan a audit thei lo nia sawi a ni a, RTI-in he fund hi a huam lo tiin media ṭhenkhat chuan an tarlang bawk.

Hengte avang hian Rahul chuan PM CARES Fund hi a sawisel nasa hle a, sorkar laipui chu langtlang lo sorkar tiin a puh. He fund-ah hian thlakhat chhungin cheng vaibelchhe 6,000 chuang a lut hman a, he fund aṭanga pawisa hman dan leh pawisa lut zatte chu mipui hriata puangzar turin sorkar laipui chu a phut a ni. 

PM CARES Fund-ah hian mimal leh corporate-ten pawisa an thehlut thei a, anni bakah ramdang aṭang pawhin pawisa an rawn thehlut thei bawk. He fund-a pawisa lutah hian chhiah (tax) lak a ni lo a, he fund-a thuneitu lu ber chu prime minister a ni a, ani bakah hian finance, home affairs leh defence minister-te chu roreltu zingah an tel bawk.

Ram chhunga chhiat tawh thut atana hman tur, Prime Minister's National Relief Fund (PMNRF) chu kum 1948 khan din a ni a, fund-a pawisa hman loh la bang hi nikum December thla khan Rs vbc 3,800 a la awm a ni. He fund-a pawisa te hi Covid-19 dona atan pawh a hman theih tho thu Rahul chuan a sawi.