Maha-ah lockdown zawm Ṭha lo mi nuai khat chuang tawh

India rama Covid-19 hri kai tamna ber state, Maharashtra-ah inkharkhip (lockdown) dan zawm ṭhat loh avanga case register chu nimin thleng khan 1,03,345 a awm tawh a, lockdown palzut vanga man hi mi 19,630 an awm bawk.

Maharashtra police-te chuan lirthei 55,784 an man tawh a, dan loa an state-a lut case ziah luh tawk zat hi 1,291 a ni bawk. Lockdown palzut vanga case an register leh an man te aṭanga pawisa lut zat hi Rs 3,87,50,494 a tling tawh a ni.

Maharashtra police-te chu darkar 24 chhung ngawrh takin an state venhim tumin an duty a, police 887-te chuan Covid-19 an kai tawh a, heng zinga 7 chuan he hri hi an thihpui tawh bawk.

Nimin khan Maharashtra-a Buldhana district chu Covid-19 awm lohna district-a puan a ni a, he district aṭang hian nimin khan hri damlo pathum enkawl dam a ni tih sorkar chuan a puang a ni. 

Maharashtra state-ah hian hri kai hi mi 22171 an tling tawh a, heng zinga mi 4199-te chu enkawl dam tawh niin, hri vanga thi hi mi 832 an awm tawh a ni.