Maggi-in lab test paltlang lo Nestle India hnenah Rs nuai 45 chawitir

Nestle India siam, Maggi noodles chuan laboratory test a paltlang lo a, hei vang hian Uttar Pradesh-a Shahjahanpur district thuneitute chuan Nestle India leh a distributor-te chu pawisa a chawi turin a hriattir.

District thuneitute chuan Maggi hi ei atana a him tawk leh tawk lo enfiah turin nikum November thla khan sample lakhawmin, laboratory-a endik turin an thawn tih an sawi. Lab-a enfiah a nih hnuah Maggi noodles-ah hian ash content chu mihring ei tura him tawka phal chin aia sang a awm tih hmuhchhuah a ni, an ti.

District thuneitute chuan Nestle India chu cheng nuai 45 chawi turin a ti a, hei bakah hian distributor pathumte chu cheng nuai 15 ṭheuh leh, seller pahnih chu cheng nuai 11 ve ve chawi turin a ti bawk a ni.

Hetihlai hian Nestle India chuan hemi chungchangah hian hriattirna an la dawng lo niin an sawi a, order an hmuh veleh court-ah khin let an tum thu an sawi. Nestle India thupuangtu chuan order hi an la hmu lo a, mahse an sample lakkhawm hi kum 2015 ami a nih thu leh, ash content awm zat chungchang en a nih thu erawh hrilh an nih tih a sawi.

Kum 2015 June thla khan FSSAI chuan Maggi-a lead content awm chu danin a phal zat aia tam nia sawiin hralhchhuah a lo khap tawh a, Nestle India chuan Maggi noodles a pekchhuak tawhte pawh lakkir vek turin a ti a ni. Kum 2015-a Maggi vanga Nestle buaina hi Uttar Pradesh aṭanga inṭan tho a ni. Mahse Nestle India hian court lamah bei zuiin, kum 2015 November thla khan hralhchhuah phalsak a ni leh a ni.