Bengaluru jail-a tang mek, AIADMK hruaitu VK Sasikala-in jail thuneitu ṭhenkhat thamna pe a, jail chhungah duhsakna a dawng nia sawitu, IPS officer D Roopa-i lakah police official hluiin defamation case a thehlut. 
D Roopa-in July thlaa hetih laia DGP (Prisons) HN Sathyanarayana Rao hnena report a thehluhah, Sasikala-i hian jail chhungah duhsakna bik a dawn theih nan thamna cheng vaibelchhe hnih a pe niin a sawi a ni a, Rao pawh hi thamna dawnga puh zingah a tel bawk. Parappana Agrahara Central jail chhunga Sasikala-in jail tang thawmhnaw aiah salwar suit ha chunga a tei kual lai video footage pawh hmuh tur a awm a ni. 
Rao chuan Roopa-in a puhna chu thu dik lo a nih thu a sawi a, a ṭul anga hma a lak zui tur thu pawh a lo sawi tawh a, defamation case hi a thehlut ta a ni. 
Rao-a ukil, Puttige Ramesh chuan Roopa-i bakah, Kannada TV cahnnel leh English newspaper pakhat lakah thubuai hi thehluh a ni bawk tih a sawi. Ramesh chuan Roopa-i hian a superior hnenah hian engmah hriattir lawk a nei lo a, dik lo taka thiltiah a puh nghal a, hei hi dan kalh a ni tih a sawi. Hei bakah hian dan kalhin media mite hnena information pe-ah a puh bawk. 
Roopa-i chuan a laka defamation case thehluh chungchang hi hriattir a la ni lo tih a sawi. Jail chhunga thil thleng a pholan chungchang chhuichiang tura Karanataka sorkarin thuchhuah a siam chuan Sasikala-i enkawl kawnga dan loa duhsak bikna lantir a ni tih a tichiang hle a ni, a ti. Rao-a hian jail hotu a nih laia hetiang thil a thlen theih dan hi a sawifiah a ngai a ni, a ti.