Keite kah tumtu minister ban turin phut

Maharashtra eptu party-te chuan medical education minister Girish Mahajan chu a revolver hmanga keite kah a tum avangin minister a nihna aṭanga ban turin state sorkar an phut.

Eptute chuan minister chu ramsa thah a tum avangin wildlife protection act palzuta puhin, thubuai siamsak an phut bawk.

Mahajan hi BJP minister niin, chief minister Devendra Fadnavis nen pawh an inpawh ṭha hle nia sawi a ni.

Marathi news channel chuan minister-in a revolver nena Jalgaon district-a Chalsigaon-a keite a veh lai hi an tilang a ni. Mahajan chuan keite hi a convoy aṭanga feet 400 vela hlaah hmuh a nih hnuin, a umzui tih a sawi.

NCP thupuangtu, Nawab Malik chuan minister chuan Wildlife Protection Act a palzut tih sawiin, keite hi mihringte sehin mihring tana hlauhawm pawh ni se, a veh hna chu minister ni loin forest official-te tih tur a ni, a ti. Dan palzut zawnga a chet avangin minister aṭanga ban nghal tura an phut thu a sawi.

Congress thupuangtu Sachin Sawant chuan minister Mahajan hian a hma pawhin school-a function a hmanpuinaah a kawngah revolver hi a pai lang niin a sawi bawk.