Sorkar laipuiin digital media tan dan a siam dawn

Union information and broadcasting minister Anurag Thakur chuan sorkar laipuiin digital media tana dan siamna tur bill a buaipui mek tih a sawi.

Minister chuan tun hma lam chuan chanchinthar thehdarh dan hi kawng khat chauh a ni ṭhin a, mahse tunah chuan electronic leh digital media lam rawn ṭhang chho zel vangin, chanchintharte pawh kawng hrang hranga thehdarh a lo ni ta a ni, a ti. Thingtlang khaw kilkhawr takah pawh digital media kaltlangin chanchinthar an lo hriat zung zung theih tawh thu a sawi bawk.

"Digital media hian thil ṭha leh remchang tak a siam rualin chona pawh tam tak a awm bawk. Dik leh felfai taka kalpui a nih theihna turin sorkar chuan eng nge a tih turte a ngaihtuah dawn a ni. Hemi atana bill pharh tur hian hma kan la mek a ni," tiin minister chuan a sawi.

Thakur chuan newspaper registration tih dan pawh awlsam zawka tih theih dan tur buaipui mek a nih thu sawiin, sorkar laipui chuan 1867 Press and Registration of Books Act thlakna tur dan thar a siam thuai dawn a ni, a ti. He dan siam thar hnuaiah hian a hmaa registration tihfelna tura thla li vel ngai ṭhin kha, online mode hmangin kar khat chhung lekin tihfel a ni thei tawh dawn niin a sawi.

Chanchinbute chu a hun takah, mipuite tan chanchinthar dik tak pe chhuak ṭhin turin a chah a, sorkar dik tawk lohna an tarlan rualin, sorkarin mipuite tana scheme a siam te leh a policy hrang hrangte pawh mipui nawlpuite an hriat theih tura an thehdarh a ngai a ni, a ti. Media mite chu an mawhphurhna dik tak hrechiang a, mipuite rilru chawkbuai leh tihhlauthawng zawnga boruak siam lo turin a chah bawk.