Congress-in RS-a Kharge thlaktu tur la ruat lo
Parliament winter session neih a ni dawn hnai tawh a, hetih lai hian Congress party chuan Rajya Sabha-a leader of opposition (LoP) tur an la ruat lo.
Rajya Sabha-a LoP hi Mallikarjun Kharge a ni ṭhin a, mahse Congress party hian 'one leader, one post' policy an hman avangin party president thar thlan dawn khan a chuh dawn avangin Kharge hi LoP a nihna aṭangin a bang a, Congress president thar atan thlan zui a ni ta bawk a ni.
Kharge hian Ghulam Nabi Azad a chawlh hnuah, kum 2021 February thla aṭang khan Parliament upper house-a LoP dinhmun hi a chelh a ni. LoP a nihna aṭang a ban hnu hian a thlaktu turin party senior leader - P Chidambaram, Mukul Wasnik, Digvijay Singh, leh Pramod Tiwari-te hming chu sawirik a ni a, mahse thlan fel a la ni lo.
Party president thar Kharge kaihhruaina hnuaiha December 4 hian Congress steering committee meeting hmasa ber an nei dawn a, he hunah hian Parliament session lo awm tura an hmalak dan turte an ngaihtuah ang. Kharge-a'n party hotu lu ber dinhmun a luah hnuah, body chhunga thuneitu sang central working committee chu ṭhiatin, a aiah steering committee hi din a ni. Steering committee-ah hian CWC member-te chu dah zui vek an ni.
Parliament thlasik ṭhutkhawm, winter session hi December 7 aṭanga neih ṭan a ni dawn a, December 29 thleng a awh ang. Session chhung hian rorel inkhawm hi ṭum 17 an nei hman dawn a ni.
Session ṭan hma hian tihdan phung pangngai angin, Lok Sabha speaker leh Rajya Sabha chairman chuan rorel inkhawm tluanga taka neih a nih theihna atan all-party meeting an ko ang.