Jama Masjid-a mipa tel loa hmeichhia luh khapna thupek siam sut leh nghal

Delhi-a Jama Masjid enkawltute chuan Ningani khan thuchhuah siamin, mipa tel loin hmeichhiate luh khap an ni tih a sawi. Mahse he thupek hian social media lamah leh hmeichhe pawl hrang hrang aṭanga sawiselna a tawh nasat avangin a hnuah an sut leh nghal.

Hmeichhiate luh khapna thupek hi Jama Masjid luhna main gate pathumah tar a ni.

Sawiselna nasa tak a awm hnuah, Delhi lieutenant governor VK Saxena chuan Jama Masjid Shahi Imam, Syed Ahmed Bukhari chu biain, an thupek hi sut leh turin a ngen. Imam Bukhari pawhin Governor ngenna hi zawmin, thupek hi an sut leh nghal a, hemi rual hian mosque zahawmna chu vawng turin a tlawhtute a ngen zui ngal a ni.

Bukhari chuan, "Gate-a hriattirna kan tarte chu kan la thla a, mahse kan chowkidar-te chuan thil awmdante uluk takin an thlithlai reng dawn a ni. Kan duh dan ang loa khawsa hmeichhiate chu kan dang dawn a, an nu leh pate pawh kan hriattir ang," tiin a sawi. Mosque chu ṭawngṭaina hmun a ni a, inkawmkhawmna leh intihhlimna tur hmun a ni lo tih a sawi nghal bawk. Ṭawngṭai tura kalte chu tupawh, hmeichhia pawh ni se khuahkhirhna engmah siam a nih lo thu a tarlang.

Jama Masjid public relation officer Sabiullah chuan moque compound-ah thil mawi lo tak a thlen ṭhin avanga khapna hi an siam tih a sawi. "He hmun hi sakhaw hmun pawimawh a ni a, mi tam takin pathian be turin an tlawh a ni. Hetih lai hian ṭhenkhat chuan intihhlimna hmun atan hman an tum a, heng mite tan bik hian khuahkhirhna hi kan siam a ni," tiin khapna an siam chungchang hi a sawifiah. Mahse an thupek siam hian sawisel a hlawh nghal hel a, Delhi Commission for Women (DCW) chief Swati Maliwa chuan hmeichhiate dikna chanvo palzutna nasa tak a ni tiin, Imam hnenah hriattirna pek a tum thu pawh a sawi hman a ni.

Kum zabi 17-na, Mughal ho hunlaia sak, Jama Masjid hi sakhaw thila tlawhtu tam tak an awm rualin, khualzinten an tlawh nasa hle bawk.