Priyanka Gandhi Vadra-in Bharat Jodo Yatra a zawm

Congress party hruaitu, Rahul Gandhi kaihhruai Madhya Pradesh-a Bharat Jodo Yatra neih mek chu a farnu, Congress general secretary in-charge of Uttar Pradesh Priyanka Gandhi Vadra chuan a ni hnihna atan nimin khan a zawm.

Nimin khan MP-a yatra an neih ni thumna a ni a, Khargone district-a Kherda aṭangin zingah an chhuak. Priyanka Gandhi Vadra bakah a pasal Robert Vadra leh an fapa, Rehan-te pawh an kal a ni.

Bharat Jodo Yatra hi Madhya Pradesh-ah hian ni 12 chhung neih a ni dawn, km 380-a thui an kal hnuah Rajasthan state an lut ang.

Rahul Gandhi-a'n MP a luh hnua thaha vauna lehkha thawntu Daya alias Narendra Singh chu Ningani khan police-ten an man. Daya hian Gandhi hi Indore a thlen hunah bomb hmanga tihhlumah a vau a ni. Police-te chuan Ningani khan Ujjain district-a Nagda area-ah an man tih sawiin, a hma pawhin lehkhathawn leh phone call hmangin mi dang pawh a lo vau fo ṭhin niin an sawi.