BJP-in Kejriwal thah tumin an phiarru, Manoj Tiwari pawh a inrawlh : Manish Sisodia

Delhi deputy chief minister Manish Sisodia chuan BJP chu Delhi chief minister leh Aam Aadmi Party (AAP) hotu Arvind Kejriwal thah tuma phiarruah a puh a, he thilah hian Delhi BJP MP Manoj Tiwari pawh a inrawlh a ni, a ti.

Manish Sisodia chuan Gujarat leh Municipal Corporation of Delhi (MCD) inthlan lo awm turah BJP chuan chak loh an hlauh avangin phiarrukna tenawm tak hi an siam niin a puh a, mahse AAP chuan hetiang politics tenawm tak hi a hlau ve lo tih a sawi nghal bawk.

Nimin khan Sisodia chuan a twitter-ah hemi chungchang hi tarlangin, "BJP chuan Arvind Kejriwal thah tumin an phiarru a, an MP Manoj Tiwari chuan langsar takin a mi leh sate chu Kejriwal bei tur hian a hrilh a, amahin ruahmanna a siam vek a ni. Mahse AAP chuan a politics khelh dan tenawm tak hi a hlau lo a, mipuite chuan an suahsual rawngbawlna man hi chhanna an pe ngei dawn a ni," a ti.

Tiwari hian a hmain a twitter-ah MCD inthlan neih tura party ticket an pek danah leh, eirukna thleng chungchangah mipuite leh AAP volunteer-te chu Kejriwal lakah an thinrim hle a, hei vang hian Kejriwal himna chungchang pawh ngaihtuah a ngai hle niin a lo sawilang a ni.