Kan ram inchi khat pawh kan pe lo ang : Maha CM

Maharashtra chief minister Eknath Shinde chuan an ṭhenawm state, Karnataka nena ramri buaina an neih mekah, a kaihruai sorkar chuan Maharashtra ram chin chu inches khat pawh tu hnenah mah a pe dawn lo tih a sawi.

Eknath Shinde chuan border area-a cheng Marathi-te an chanvo dik tak an hmuh theihna turin theihtawp an chhuah mek tih sawiin, "Maharashtra ram hi tu hnenah mah inches khat lek pawh pek kan remti dawn lo," a ti. Border area-a thingtlang khaw 40 chungchanga harsatna awm mek chinfel chu sorkar mawhphurhna a nih thu a sawi bawk.

Karnataka chief minister Basavraj Bommai chuan border area-a buaina an neih mekah thingtlang khaw ṭhenkhat chuan Karnataka state lama beh duhin resolution an siam niin a sawi a, hei hi Maharashtra lam chuan thu dik lo nia sawiin, Maharashtra CM hlui Uddhav Thackera pawhin Karnataka CM hi na takin a lo bei tawh a ni.

Maharashtra Leader of Opposition Ajit Pawar chuan Karnataka CM thusawi hi a dem thu leh, an state CM Shinde leh deputy CM Devendra Fadnavid-te chu na taka chhang let turin a phut. An buaina neih mekah sorkar laipui pawh inrawlh turin a phut thu a sawi bawk.