Loneitute'n ram chhung hmun hrang hrangah kawng zawh

Loneitute chuan nimin khan sorkar laipuiin a sut leh tak, farm law pathum duh lohna lantira nawrh an huaihawt ṭan champha kum hnihna pualin, ram chhung hmun hrang hrangah kawng an zawh.

Khawpui hrang hrangah loneitute hian Raj Bhavan panin kawng an zawh a, an kawngzawh hi sorkarin farm law a sut hnua loneitute hnena a thil tiam hrang hrangte a tihhlawhtlin loh avanga lungawi lohna lantirna a ni nghal bawk.

Loneitu pawl hruaitute chuan sorkar hian minimum support price (MSP) chungchanga inbiakna a neihpui tur thu ziak ngeiin a tiam a, mahse tun thlengin engmah hmalakna a la awm lo a ni, an ti.

Sorkar laipuiin Farm Law pathum a siam hi loneitu pawl tam zawkin dodalin, he dan hi sut tura phutin Delhi border-ah kum khat chuang an inkhuar a ni. Sorkar leh loneitu pawl aiawhte hi vawi tam tak inbiakna an neih hnuah pawh an inrem thei lo a, nikum November thla khan PM Modi chuan dan pathum hi sut a, hemi hnu hian Delhi border-a state hrang hrang aṭanga loneitu kalkhawmte pawhin nawrh hi an titawp ve nghal bawk.

Mahse nawrh tihtawp hnuah sorkar hian a thil tiam hrang hrangte a la tihhlawhtlin loh avangin loneitute hian sorkar nawr nan hma an la leh dawn tih an lo sawi tawh a, nimin khan a bul ṭanna atan state hrang hrangah kawngzawh hi an huaihawt ta a ni.

Samyukta Kisan Morcha (SKM) leader Hannan Mollah chuan, "Sorkarin ziak ngeia a intiam hnuah engmah a ti zui lo a, loneitute bumtu leh phatsantu a ni. Sumdawng liante a hum zawk zel a ni. Kan thil phutte tihhlawhtlin tumna a nei lo," tiin a sawi. SKM hian hma an lak zel dan tur ngaihtuahin December 8-ah meeting a ko zui bawk.