PM Modi-a'n Maan Ki Baat vawi 95-na hmang

Prime minister Narendra Modi chuan thla tina radio programme a hman ṭhin, Maan Ki Baat vawi 95-na chu nimin khan a hmang leh.

Prime Minister chuan India-in G20 hruai hna a chan tur chungchang sawiin, khawvel huapa chona hrang hrangte hmachhawn a, chingfel turin India chuan theihna a nei a ni, tiin G20 hruaitu a nihna chu khawvel huapa thil ṭha tihna atan a hmang dawn a ni, a ti. G20 presidency hi December 1 aṭangin India-in a la dawn a ni.

Modi chuan Telangana-a puantahtu pakhat, G20 summit logo zeh telna puan petu, Veldi Hariprasad Garu chungah lawmthu sawiin, thilpek hlu tak dawn chuan a tilawm hle tih a sawi. Mi dang tam tak pawhin lehkha thawnin, India-in G20 a thleng tur chu an chhuan thu an hrilh tih a sawilang bawk.

Indian classical music leh ram danga nghawng a neih dante fakin, Prime Minister chuan ram pawn lama Indian classical music instrument hralhchhuah a pun chhoh thu leh, USA leh UK-te chu hralh chhuah tamna ram a nih thu a sawi. Hei hian khawvelin Indian music a ngaihven chho hle tih a lantir a ni, a ti.