Nakkum Republic Day-ah Egypt President khuallian a ni dawn

Nakkum January 26-a India Republic Day lawmna neih turah Egypt president Abdel Fattah al-Sisi chu khuallian a ni dawn.

Ministry of external affairs (MEA) chuan nimin khan thuchhuah siamin, Indian Republic Day lawmnaah Egypt President khuallian a nih hmasakna ber tur a ni, a ti.

Prime minister Narendra Modi chuan khuallian tura Egypt President a sawmna hi October 16 khan external affairs minister S Jaishankar chuan President al-Sisi hi a hlan a ni.

India leh Egypt hian ram pahnihte inpalaitawnna kum 75-na an lawm mek a, India hruaina hnuaia kum 2022-23-a G20 summit neih turah pawh Egypt hi 'Guest Country' atan sawm a ni bawk. MEA thuchhuah chuan ram pahnihte hian inlaichina ṭha tak neiin, an mipuite pawh inzawmna ṭha tak an nei a ni, a ti.

Republic Day lawmnaa khuallian tur hian India ṭhianṭha ram hruaitute chu sawm an ni ṭhin a, kum 1950 khan a hmasa ber atan Indonesia President Sukarno chu sawm a ni. Kum 1952,1953 leh 1955-ah erawh ram dang hruaitu sawm an ni lo thung. Kum 2021 khan Britain prime minister Boris Johnson chu sawm a ni a, mahse an rama Covid-19 hri leng vangin a rawn ṭhulh a ni.

Kuminah khan Central Asian ram panga hruaitute chu khuallian atan hian sawm an ni leh a, mahse India rama hri leng a hluar chhoh leh avang anni pawhin an rawn zin tur hi an ṭhulh a, India-Central Asia Summit neih tur pawh virtual hmanga neih a ni bawk.