Trade Union-ten Finance Minister nena meeting neih tur boycott

Central trade union 10-te chuan thuchhuah inṭawm siamin, union finance minister Nirmala Sitharaman hoa vawiina meeting neih tur chu an boycott.

Finance Minister hian trade union hruaitute hi kum tina tihdan phung angin, vawiin hian pre-budget consultation neihpui a tum a ni. He hunah hian sector hrang hrang aiawhte chuan rawtna an thlen ṭhin.

Trade union-te chuan thuchhuah siamin, meeting neih turah hian trade union-te chu minute thum ṭheuh chauh thu sawina hun pek an ni dawn a, hei hi fiamthu an thawh khumna ang leka an ngai zawk thu an sawi. Hei vang hian video conference kaltlanga pre-budget consultation neih turah hian an tel loh tur thu sawiin, an duh ang an sawi leh thlen theihna turin physical meeting neih zawk an phut. Hei bakah hian Minister chu hun bithliah siam loa policy hrang hrangte sawihona tur, open debate buatsaih turin an ngen bawk.

Thuchhuah siamtu zingah hian central trade union - INTUC, AITUC, TUCC, SEWA, HMS, CITU, AICCTU, LPF, AIUTUC leh UTUC-te an tel.