PM Modi leh Congress President-in Gujarat-ah rally nei

Gujarat assembly inthlan thawh khatna neih tura atana campaign theih hun a tawp hnai a, political party hrang hrangte an campaign ngawrh hle.

State-a rorellai, BJP tan prime minsiter Narendra Modi a campaign mek a, nimin khan Anjar, Gordhanpur, Palitana, Gordhanpar leh Rajkot-ahte rally a nei. Union home minister Amit Shah pawhin hmun pali - Kheralu, Savli, Bhiloda leh Naranpura-ah election rally a nei bawk.

BJP tan hian chief minister Bhupendra Bhai Patel, Assam CM Himanta Biswa Sarma, union minister-te - Smirti Irani leh Purusottam Rupalla bakah senior leader eng emaw zat an campaign mek bawk a ni.

Congress party president Mallikarjun Kharge chuan Mehsana leh Ahmedabad-a rally neiin, Rajasthan chief minister Ashok Gehlot pawh Congress tan a campaign bawk. Gujarat BJP minister hlui, tun thla tir lama BJP chhuahsantu Jay Narayan Vyas chuan nimin khan Congress party a zawm a, Congress President hian Ahmebadab-ah a lawmlut nghal a ni.

Aam Aadmi Party (AAP) hruaitute pawhin hmun hrang hrangah public meeting an huaihawt bawk a ni.

Gujarat assembly inthlan hi thawh hniha neih a ni dawn a, December 1 leh 5-ah vote thlakin, December 8-ah result puan a ni ang.

Assembly seat 182 awm zinga seat 89-ah inthlan thawh khatna hi neih a ni dawn a, candidate 788 awmin an zingah hmeichhia 70 an tel. Candidate zinga 167 chu criminal case nei lai an ni. Candidate-te hi party 39 ami bakah, independent candidate 339 an awm bawk. BJP leh Congress chuan seat 89-ah candidate siam vekin, AAP chuan seat 88-ah candidate an siam thung a, Bahujan Samaj Party-in seat 57 leh All Indian Majlis-e-Ittehadul Muslimeen (AIMIM)-in seat parukah candidate an siam bawk.