Sorkar quarters chhuahsan turin Mehbooba Mufti hriattir

Jammu and Kashmir chief minister hlui leh People's Democratic Party (PDP) hruaitu, Mehbooba Mufti-i chu thuneitute chuan South Kashmir-a Anantnag district-a sorkar quarters a luah mek chu chhuahsan turin an hriattir.

Anantnag deputy commissioner chuan Inrinni khan Mufti hnenah hriattirna hi pein, Housing Colony Khanabal-a quarters number 7 a luah mek chu darkar 24 chhunga chhuahsan turin a ti a ni. Hun tiam chhunga a chhuahsan loh chuan, dan hmangin a quaters aṭang hian chhuah tir a ni ang, a ti.

October 20 khan Srinagar, Gupkar area-a sorkar bungalow a luah mek chu chhuahsan turin Mufti hian hriattirna a dawn thu a lo sawi tawh bawk.

Kum 2019-a Jammu and Kashmir state nihna ṭhiat a, Union Territory-a dah a nih khan chief minister hluite hnena an chen zui zelna tur pekna dan chu sût a ni. Kum 2020 khan chief minister pahnih, Omar Abdullah leh Ghulam Nabi Azad-te pawhin an official residence an lo chhuahsan tawh a ni. Thuneitu lam hian Mufti bakah MLA hlui pasarihte pawh an awm mekna, sorkar quarters chhuahsan turin hriattirna an pe bawk a ni.

Mufti-i pa, Muhammad Sayeed pawh kha J&K chief minister hlui a ni. State dangte ang lo takin J&K chief minister-te hi an term a tawp hnuah pawh an awmna bungalow chhuahsan kher tura tih an ni ngai lo.