CAA hman a ni thuai ang : Union Minister Pramanik

Union minister of state (home) Nisith Pramanik chuan Citizenship Amendment Act (CAA) chu hman a ni thuai dawn tih a sawi.

North Bengal-a Mathabhang-a rally neihnaa thu a sawiah, Pramanik chuan, "Bangladesh aṭanga Hindu rawn raltlan, Matuas-a state-a rorellai, Trinamool Congress chuan a lo tinawmnah thei hle a ni. Dik lo taka puhin thubuaite siamsak an ni. CAA hi heng miten India khua leh tui an nih theihna tura siam a ni. He dan hi India ram hmun hrang hrangah, West Bengal-ah ngei pawh hian hman a ni thuai dawn a ni," a ti.

TMC chuan union minister-in an party a puhna chu thudik lo a nih thu sawiin, "BJP chuan Bengal hi ṭhendarh a tum a, raltlante bum tumin CAA chu hmanruaah a hmang a ni. Hetianga ruahmanna tenawm tak an siam hi a hlawhtling dawn chuang lo. Mutas-te hi India khua leh tui ni tawhin, kum eng emaw chen chu inthlanah pawh an tel ve vek tawh a ni," tiin an sawi.

CAA hi TMC chuan dodalin, an duh lohna lantirin rally pawh an lo huaihawt fo tawh a ni. West Bengal chief minister Mamata Banerjee pawhin an state-ah CAA hman a ni ve dawn lo tih sawiin, kum 1971 hma lama India rama raltlan rawn lutte chu India khua leh tui nihna pek an ni sa vek tawh a ni, a ti.

TMC state general secretary Kunal Ghosh chuan, "Inthlan awm apiangin BJP hian CAA chungchang hi an sawichhuak ziah a ni. Mipuite rilru hruaikawi an tum a, hei hi an tihdan ve reng a ni. Keini chu kan dinna ngaiah nghet takin kan ding. West Bengal-ah hian CAA emaw, NRC emaw hman a ni ve dawn lo," tiin a sawi.