Ni 7 chhung Delhi AIIMS server system a chhe tawh

Delhi-a All India Institute of Medical Sciences (AIIMS) server-based system chu hack sak an nih hnuah ni sarih chhung a chhe tawh a, hna pawh manual in an thawk a ni. Investigator-te chuan India rama medical institution pawimawh-in cyber-attack a tawhnaah hian firfiak lam leh ram dang inrawlh an awm niin an ringhlel.

Hetih lai hian police-te chuan hacker-ten system siamṭhat lehna atan cryptocurrency-ah Rs vbc 200 an phut nia report awm chu thu dik lo a nih thu an sawi.

Server a chhiat avangin online appointment, bill, damlo te hnena online hmanga report an pekte thlengin a nghawng vek a ni. Manual-a kalpui a ngaih tak avangin damdawi-in lama thuneitute chuan diagnostic, labs leh OPD service-ah staff an dah belh a ni.

AIIMS Delhi-ah hian kumtin damlo nuai 38 vel enkawl an ni ṭhin. Mahse an system khawih sak an nih tak avangin heng damlote data zawng zawng hi a bo tih an sawi. Damlo an enkawl zingah hian political leader, bureaucrats leh judge tam tak an tel.

Intelligence agency leh National Investigation Agency official-te pawhin AIIMS hi tlawhin, case hi an buaipui mek. National Informatics Centre leh Indian Computer Emergency Response Team chuan damlo data bo te hi hmuh leh tumin an bei mek bawk a ni.

AIIMS-ah hian computer 5,000 vel an hmang a, heng zinga computer 500 chu anti-virus leh anti-malware software hmangin uluk taka scan an ni tawh a, a bak hi ni nga chhung velin scan zawh hman an beisei.