JMM-in Rahul Gandhi-a Bharat Jodo Yatra zawm

Congress party hruaitu Rahul Gandhi-a hoa Madhya Pradesh-a Bharat Jodo Yatra neih mek chu Jharkhand Mukti Morcha (JMM) chuan an thlawpna lantirin nimin khan an zawm ve.

Nimin khan yatra hi Indore district-a Sanwer khuaah neih a ni a, JMM MLA leh minister-ten an kalpui a ni. Jharkhand-a JMM minister Mathilesh Thakur chuan a twitter-ah Bharat Jodo Yatra-a a tel ve thu hi tarlangin, ram ṭhendarh tuma hmalatute chu an hlawhtling ngai lo ang tih a sawilang bawk.

JMM hian Jharkhand-ah Congress leh Rashtiray Janata Dal (RJD) nen ṭangrual sorkar an siam mek a ni.

Bharat Jodo Yatra hi September 7 khan Tamil Nadu-a Kanyakumari aṭangin neih ṭan a ni a, Kashmir thleng ke hian an kal dawn a ni. Km 3,570 kalin, state leh UT 12 an paltlang ang. November 23 khan Maharashtra aṭangin Madhya Pradesh hi an lut a, ni 12 chhung kalin November 4 hian Rajasthan an lut ang. Madhya Pradesh-ah hian km 380-a thui an kal dawn a ni.