Mehboof Mufti-i a laizawnnu inah insawn

Jammu and Kashmir chief minister hlui, People's Democratic Party (PDP) Mehbooba Mufti-i chu Srinagar-a Gupkar road-a a chenna, Fairview aṭanga insawnchhuak tura hriattir a nih hnuah, Thawhṭanni khan Srinagar khawdaia a laizawnnu chenna inah a insawnchhuak ta.

PDP thupuangtu Najam-Us-Saqib chuan Mehboof hian Thawhṭanni khan a bungrua zawng zawng nen Gupkar Roa-da a chenna hi a chhuahsan thu leh, Fairview pawh sorkar kuta a hlan thu a sawi.

Estate Department chuan October 15 khan PDP hotu hi Fairview Guest House chu November 15 hmaa chhuahsan turin a hriattir a, Tulsi Barg area-ah sorkar quarters pakhat chu a insawnna atan hian a ruahman sak a ni. Mahse Mehbooba chuan an awmna tura an ruahman hi duh loin, Khim area-a a laizawnnu in chu a pan ta zawk a ni.

Fairview hi Mehbooba leh a pa thi ta, CM hlui Mufi Mohammad Sayeed-ten J&K chief minister an nih laia an chenna a ni. Mahse sorkar laipuiin J&K state ṭhendarh a, union territory pahniha a siam leh, J&K special status pekna a tihtawp hnua dan a siamṭhatah, CM hluite hnena an damchhung sorkarin an chen zuina tur a pek ṭhin chu tihtawp a ni a, hei vang hian Mehbooba pawh a official residence hi chhuahsan tura hriattir a ni.