2021-22-ah BJP-in fund Rs vbc 614.53 dawng

Kum 2021-22 chhunga political party hrang hrangten contribution fund an dawn zingah, rorellai BJP chuan a dawng hnem fal hle.

Election Commission data-a a landanin, BJP hian kum 2021-22 chhungin fund Rs vbc 614.53 a dawng a, Congress party aiin a let ruk chuang zetin a dawng hnem. Congress party hian Rs vbc 95.46 a dawng a ni.

West Bengal-a rorellai, Trinamool Congress chuan hemi hun chhung vek hian contribution fund hi Rs nuai 43 a dawng a, Kerala-a rorellai CPI-M chuan Rs vbc 10.05 a dawng. West Bengal assembly inthlan hi March-April, 2021 khan neih niin, Kerala assembly inthlan hi April,2021 khan neih a ni bawk.

National party palite Election Commission hnenah contribution report hnuhnung ber an thehlut hi Thawhlehni khan mipuite hmuh theiha phochhuah a ni.

Representation of the People Act chuan political party-te hi kumin contribution fund an dawn, mimal leh pawl/company emaw aṭana Rs 20,000 chuang pe chinte chu report thehlut vek turin a ti a ni.

Mimal leh company-te bakah, electoral trust-te pawhin party tan hian sum an pe ve ṭhin. BJP tan contribution pe tam zingah hian Prudent Electoral Trust a tel a ni.

Delhi leh Punjab-a rorellai, Aam Aadmi Party (AAP) chu state pathumah recognised party a ni tawh a, kum 2021-22 khan fund hi Rs vbc 44.54 a dawng. AAP hi Delhi leh Punjab bakah Goa-ah recognised party a ni tawh.