'The Kashmir Files' chungchanga Israel filmmaker thusawiin buaipui a hlawh

Israel filmmaker, Nadav Lapid-a'n 'The Kashmir Files' movie a sawiselna chuan buaipui leh beih zui a hlawh hle a, mahse Lapid chu a thusawiah hian a dingnghet a, he film chungchangah hian ṭawngchhuak an awm a ngai a ni, a ti.

Lapid hi Goa-a International Film Festival of India-a international jury a ni a, festival tawp niah Vivek Agnihotir direct, 'The Kashmir Files' chu mipuite rilrua mimal ngaihdan theh lar tumna, thil mawihnai lo tak a ni tiin a sawi a, festival-a tihchhuah zinga a tel chu mak a tih thu pawh a sawi.

"The Kashmir Files' hi kum 1990 chhoa Kashmir Valley-a Kashmir Pandit-ten Muslim helte kut an tawrh dan, Kashmir Valley aṭanga an tlanchhiat dante tarlanna ni. Hei vang hian Israel filmmaker thusawi hi India rama demna a nasa hle.

Mahse Lapid chu a ṭanna ngaihah dingin, "Festival-a thil thleng hi a mak hle. Sorkar festival leh India ramah pawh festival lian ber a ni. He film hi India sorkar siam ni chiah loh mah se, vawrh darh a tum dan hi a mak hle. Hei hian Kashmir chungchanga Indian policy a tilang a ni, pawl inepna a tel a ni," a ti.

He film hi tlangzarh a nih khan BJP hruaitute chuan an vawrh lar nasa hle a, hei vang hian a hlawhtlin phah hle bawk. Mahse hei hi chi inkarah boruak ṭha lo a tihlen phah nia sawisel pawh an tawk zui a ni.

Filmmaker Lapid-a thusawi hi India rama Israel palaite pawhin an sawisel a, Israel ambassador Naor Gilon chuan Lapid chu thupha chawi tura a phut thu a sawi bawk.

Mahse Lapid chuan foreign jury chairman-in an ram film chu sawisel ve ta se, a hlim viau kher loh pawhin lawmawm a tih tur thu a sawi. "Mi tam takin an rilru ang leh thudik tak an sawichhuah ngam lohnaah, tu emaw chu a ṭawngchhuak a ngai a ni,"= a ti.