Dec 12-ah EC-in Shiv Sena pawl hnihte chungthu ngaihtuah dawn

Election Commission chuan Shiv Sena party-a Uddhav Thackeray leh Eknath Shinde pawlten party symbol neitu zawk nih an inchuh chungchang chu December 12 hian a ngaihtuah dawn.

Shiv Sena party hi an Thakcray lamṭang leh Shinde lamṭangte an phel hnua, a ziding zawk nia insawiin party hming chhawmtu tur leh, symbol hmangtu zawk nih an inchuh a ni.

October thla khan Election Commission chuan Maharashtra-a by-election neihah, Shiv Sena hnuaia pawl pahnihte hi party hming leh symbol 'bow and arrow' chu hman a khapsak ve ve a ni. By-election atana an hman turin Thackeray lamṭangte hi 'ShivSena - Uddhav Balasaheb Thackeray' leh Shinde lamṭangte hi Balasahebanchi Shiv Sena' (Balasaheb's Shiv Sena) tih hming a pe a, hei hi thupek dang tihchhuah hma chu hmang chhunzawm turin a ti bawk.

Shinde lamṭangte hi Thackeray kaihhruai Shiv Sena laka helin an chhuak a, Shiv Sena MLA 55 zinga 40 leh Lok Sabha member 18 zinga 12 chuan Shinde hi an thlawp a ni. Shiv Sena MLA tam zawk an hel avangin Maharashtra-a Shiv Sena-NCP-Congress ṭangrual sorkar chu tlain, Uddhav Thackeray pawhin chief minister a nihna aṭangin a bang zui bawk. A hnuah Shinde lamṭangte hian BJP nen ṭangrual sorkar thar siamin, Shinde hi chief minister-ah a awm zui a ni.