Gujarat assembly inthlan thawh khatna nei

Gujarat assembly inthlan thawh khatna chu nimin khan neih a ni a, assembly bial 89-ah vote thlak a ni. Inthlan thawh hnihna chu December 5-ah neih a ni ang.

Nimina vote thlakna, bial 89 hi Kutch leh Saura­shtra region leh state chhung chhimlama district 19 huam chhunga mi a ni.

Gujarat-ah hian BJP chuan kum 1995 aṭang khan sorkarna an siam a, mahse an seat lak zat hi a tlahniam zel a ni. Kum 2018 inthlanah seat 137 an lak phak laiin 2002-ah erawh seat 99-ah an tla thla. Sorkarna siam leh ngei tumin ṭan pawh an la nasa hle a, prime minister Narendra Modi hoin party hruaitu lawkte an campaign nasa hle. Tun ṭum inthlanah hian an dinhmun siamṭha a, seat 182 awmna assembly-ah hian seat 140 an target a ni.

Aam Aadmi Party (AAP) pawhin Delhi leh Punjab-a sorkarna an siam hnuah Gujarat lamah an huang zauh tum hian ṭan an la hle. AAP hotu Arvind Kejriwal chuan Gujarat hi a target dawt a ni tih sawiin, kum 2018 inthlanah seat khat mah la pha lo mah se, kuminah erawh seat 92 lak phak an tum tih a sawi.

Eptu party lian ber, Congress party erawh campaign-na lamah an thawm a na vak lo. Inthlan hmasa lama star cam­paigner, Rahul Gandhi chu Bharat Jodo Yatra a neih mek avangin Gujarat-ah hian ni khat chauh a campaign hman a ni.