India-in G20 hruaitu dinhmun chelh ṭan

India chuan nimin aṭang khan G20 presidency dinhmun a chelh ṭan ta a, kum khat chhung hruaitu dinhmun hi a chelh ang.

November 15 leh 16-a Bali-a G20 summit neihah khan, summit kharna inkhawmah Indonesia chuan bloc presidency nihna hi India kutah a hlan a ni, nimin aṭang khan he chanvo hi a chelh ṭan ta a ni.

G20 hruaitu dinhmun a chelh chhung hian India hian ram chhung hmun hrang hrangah meeting 200 vel a huaihawt dawn a, a hmasa ber chu tunkar hian Udaipur-ah neih a ni ang. G20 summit chu September 2023-ah New Delhi-ah neih a ni dawn bawk.

Nimin aṭang khan G20 hruaitu dinhmun chelh lawmna pualin ram chhunga monument 11-te chu kar khat chhung tih en a ni dawn a ni.

G20 develop leh developing country ram 20-te intergovernmental forum a ni a, group member-te chu Argentina, Australia, Brazil, Canada, China, France, Germany, India, Indonesia, Italy, Japan, the Republic of Korea, Mexico, Russia, Saudi Arabia, South Africa, Turkey, UK, US leh European Union-te an ni. G20 hian khawvel puma gross domestic product (GDP) 80% chuang leh international trade 75% an hauh pha a, khawvel puma mihring awm zat hmun thuma ṭhena hmun hnih an awm bawk.

President Droupadi Murmu chuan G20 presidency dinhmun chelhtu, TeamIndia chu duhsakna a hlan a, 'Vasudhaiva Kutumbakam' (world in one family) thupui hmangin a chanvote ṭha tak leh hlawhtling taka a hlenchhuah a duhsak thu a sawi.