Bharat Jodo Yatra-ah mobile library siam

Congress party hruaitu, Rahul Gandhi hoa Bharat Jodo Yatra neih mekah mobile Bharat Jodo library siam tel a ni.

Truck hmanga mobile library an siamah hian lehkhabu 1,000 vel; politics, history leh hruaitu larte chanchin ziahna bu an dah a, heihi yatra-a kalten an hun awla an chhiar turin an ti a ni. Yatra zawh hnuah pawh Congress party chuan ram chhung hmun hrang hrangah Bharat Jodo library hi 500 vel siam zui an tum.

All India Mahila Congress national legal aid coordinator Avani Bansal chuan yatra-a kal zinga mi 17-te chuan mobile library hi siam a ṭul nia hriain an siam tih a sawi a, mi tam takin hriatna neih belh phahna atan an hmang thei dawn a ni, a ti.

Rahul Gandhi chuan nimin khan Madhya Pradesh-ah Bharat Jodo Yatra hi a neih chhunzawm leh a, lemchanthiam Swara Bhasker pawhin a zawm a ni. Hemi hma hian lemchan lama hming langsar - Amol Palekar, Sandhya Gokhale, Pooja Bhatt, Riya Sen, Sushant Singh, Mona Ambegaonkar, Rashmi Desai, leh Akanksha Puri-te pawhin yatra hi an lo zawm ve tawh bawk. Hollywood star John Cusack chuan a twitter-ah yatra neih mek hi a thlawp thute a tarlang bawk a ni.