Bilkis Bano-i'n Supreme Court-ah petition thehlut

Bilkis Bano chuan kum 2002-a Gujarat intualvuakna thleng ṭuma pawngsual rawntu leh, a chhungte thattua puha thiam loh chantir tawh mi 11-te Gujarat sorkarin a chhuah zalen chu Supreme Court-ah a khing let.

August 15, Independence Day khan Gujarat sorkar chuan remission policy hnuaiah heng mi 11-te hi a chhuah zalen. Mi 11 chhuahte hi Hindu organisation chuan pasalṭha ang maia lo chawimawiin, parṭhi te an lo awrhtir a, hei hian ram pumah sawisel a hlawhin lungawi lohna pawh an lantir a ni.

Hetih lai hian Gujarat sorkar chuan mi tangte a chhuah chungchangah sorkar laipui pawhin a pawmpui tih sawiin, thiam loh chantirte hi tan-in chhunga an nungchang a ṭhat avanga chhuah an ni tih a sawi.

Bilkis Bano chuan Nilainia Supreme Court-a petition a thehlutah, pawngsual rawntu leh a chhungte thahsaktute chhuah tur chungchanga thutlukna siamtu Gujarat ni loin, an thubuai ngaihtuahna, Maharashtra siam zawk tur a ni, a ti.

Kum 2002-a Gujarat intualvuakna thlen laia pawngsual rawn a tawh khan Bilkis Bano hi kum 21 mi a ni a, amah pawngsualtute hian a chhungte pakua an thahsak bawk a, an thah zingah hian a fanu kum thum mi pawh a tel.