PM Modi-a'n ram mipuite hnenah thuchah a sawi Economic package Rs vbc nuai 20 a puang

Prime minister Narendra Modi chuan nizan dar 8 khan TV kaltlangin ram mipuite hnena thuchah a sawi a, hei hi India rama Covid-19 a len hnua video message huam tela ram mipuite hnena thuchah a sawi ṭum ngana a ni.  

Narendra Modi chuan ram chhunga hri leng avanga nunna chan chhungte a tawrhpui thu a sawi. Hetiang chhiatna rapthlak hi hriat a la ni ngai lo tih sawiin, mihringte ngaihtuah phak bak a ni, a ti. Mahse he hri lakah hian mihringte an tlawm dawn lo a, fimkhur takin khawvel chhanhim tura bei chungin hmalam pan zel erawh a ngai a ni, a ti. 

PM chuan hripui lengin kawng hrang hranga harsatna a thlen mek chhawmdawlna tur financial package, Rs vbc nuai 20 siam a nih thu a puang. He package hi India mahni kea a dinna tura lungphum pawimawh tak a ni dawn a ni tih sawiin, package hi India  Gross Domestic Product (GDP) aṭangin 10% a tling a, sector hrang hrang chhawmdawlna atan hman a ni dawn tih a sawi. "He package hi land, labour leh factor pawimawh tak tak atan hman a ni dawn. Hnathawktu tam tak awmna, MSME,

agriculture leh sector dang tan a ni a; loneitu, inhlawhfa leh middle-class, dik taka chhiah pe ṭhin leh India hmasawnna atana tha thawhtute tan a ni," a ti. Modi chuan union finance minister Nirmala Sitharman chuan Nilaini aṭang hian financial package kimchang hi a puang dawn tih a sawi  bawk.

Ram dang rinchhan loa India a dinna tura pillar pawimawh panga te sawiin, chungte chu Economy, Infrastructure,Tech-driven System,Vibrant Demography leh Demand-te an nih thu Modi chuan a sawi. 

"He hrileng hian ramchhunga thil siam, sumdawnna leh supply chain-te pawimawhzia min zirtir a ni. India mi tupawhin ramchhunga thilsiam ngeite leiin, ram chhung thil siamte kan thlawpzia kan lantir a ngai," tiin PM chuan a sawi. 

Modi chuan, hri leng chu a la reh mai dawn lo tih scientist-te'n an sawi a, hei vang hian mask vuah chhunzawm zel leh social distancing hman chhunzawm zel a ṭul thu a sawi. India ram mipui vaibelchhe 130-te chakna hmangin India chu thuam chak a ni dawn a, midang rinchhan lo turin an siam thei a, an siam dawn bawk a ni, a ti. 

PM Modi chuan lockdown hman mek, Pathiannia a tawp hnua Lockdown 4.0 kalpui dan tur May 18 hmain puan chhuah a ni dawn tih a sawi a, a kalphung pawh a danglam dawn tih a sawi bawk. 

Lockdown chhunzawmna kalphung hi Thawhṭannia PM-in video conference hmanga state leh Union Territory chief minister-te meeting a neihpui ṭuma rawtna hrang hrang an siam behchhanin siam a ni ang.