District tinah thla khatah mi 800 zel test nei dawn

Union health ministry chuan ram chhunga district tinah, thla khatah mi 800 zel Covid-19 test neih a nih dawn thu a tarlang a, kar khatah mi 200 zel test neih pui tur a nih thu a tarlang bawk.

He hmalakna hi health ministry-in ram chhunga Covid-19 kai chak dan dinhmun hriatchianna atana a tih a ni a, state-te hnenah sorkar damdawi-in paruk leh private damdawi-in paliah te test-na hmun siam ṭheuh turin a hriattir.

He test runpui neih tuma sample an lak tur hi health ministry chuan high risk group-ah leh low risk group-ah a ṭhen hrang dawn bawk a ni. High risk group-ah hian health care worker-te pawh an tel dawn a, he group aṭang hian kar khat chhungin sample 100 leh thla khat chhungin sample 400 la hman tura beisei a ni.

Naupai lai bakah khuh leh khawsik nei lo-te chu low risk group-ah an awm a, he group aṭang hian thla khat chhungin sample 400 lak hman beisei a ni bawk. RT-PCR test hman a ni dawn a, ni khatah sample 25 zel a test thei a ni.

Ministry hma lakna hmang hian thla khat chhungin ram chhungah symptom nei  lo mi nuai ruk vel chu test hman an ni thei dawn a ni.