India-a Covid-19 kai mi 70,000 chuang tawh

India-ah Covid-19 kai  chu nimin thleng khan  mi 70,756 an awm tawh a, heng zinga mi 22,455-te chu enkawl dam tawh niin, he hri vanga thi hi mi 2293 an awm tawh bawk. 

Hri kai enkawl dam tawh hi hri kai zawng zawng aṭanga 31.73% a ni. 

Maharashtra chu hri kai leh hri vanga thi tamna ber state a ni zawm zel a, an state-ah hian hri kai hi nimin thleng khan mi 23,401 an awm tawh a ni.

Maharashtra dawtah hian Gujarat chu hri kai tamna ber state a ni a, hri kai hi mi 8,541 an awm tawh a ni. He state-ah hian hri vanga thi hi mi 513 an awm tawh bawk. 

Tamil Nadu chu hri kai tamna ber pathumna niin, hri kai zat hi mi 8,002 an awm tawh. Madhya Pradesh chu hri vanga thi tamna ber pathumna a ni thung a, he hri vanga thi hi mi 221 an awm tawh a ni.

Delhi chu UT zinga Covid-19 hri kai tamna ber a ni a, nimin thleng khan he hri kai hi mi 7,233 an awm. Hri kai tamna state dang leh chu Rajasthan (3,988), Madhya Pradesh(3,785), Uttar Pradesh (3,573), Andhra Pradesh (2018), West Bengal (2,063), Punjab (1,877) leh Telangana (1,275)-te an ni.