Parliament Winter Session-ah bill thar 16 pharh tum

BJP kaihhruai National Democratic Alliance (NDA) sorkar chuan December 7 aṭanga ṭan tur, Parliament Winter Session-ah bill thar 16 pharh a tum.

Sorkar laipuiin bill pharh a tum zingah hian Dentists Act, 1948 paih leh, National Dental Commission din theihna tur National Dental Commission Bill a tel. National Nursing and Midwifery Commission Bill pawh telin, hemi hmang hian National Nursing and Midwifery Commission (NNMC) din a, Indian Nursing Council Act, 1947 chu paih tum a ni.

Lok Sabha bulletin tihchhuahah, multi-state co-operative societies-a electoral process siamṭhatna tur, Multi-State Cooperative Societies (Amendment) Bill, 2022 pawh pharh tur zingah hian tarlan a ni.

Bill pharh tur zingah hian Cantonment Bill, 2022; Old Grant (Regulation) Bill, 2022; Forest (Conservation ) Act, 1980 siamṭhatna tur Forest (Conservation) Amendment Bill leh Coastal Aquaculture Authority (Amendment) Bill, 2022 te pawh an tel.

Parliament Winter Session hi December 7-ah ṭanin, December 29 thleng neih a ni ang. Session chhung hian rorel ṭhutkhawm ṭum 17 neih a ni ang. Parliament building thar chu duh anga peihfel hman a nih dawn tak loh avangin session hi building hluiah neih a ni ang.