Hmeichhe chungchanga a thusawi dan avangin SP hruaitu Azam Khan lakah thubuai thehlut

Uttar Pradesh-a Samajwadi Party (SP) senior leader, Azam Khan chu November 29-a election campaign a neihnaa hmeichhiate chungchanga a thusawi dan avangin a lakah thubuai thehluh a ni.

UP-a Ramur-ah thubuai hi thehluh a ni a, police-te chuan a thusawi chungchang hi an chhuizui nghal tih an sawi.

Azam Khan hian November 29-a Shutarkhan-a public meeting neiha thu a sawiah BJP chu na takin a bei a, BJP chu a chungah rawng takin an chet thu sawiin, "Kum li dang hetiang hian ráwng taka a la che chhunzawm zel anih chuan, nau lo piang tur pawhin a nu pum chhung aṭang chuan khawvelah a rawn chhuak duh angem tiin min zawt hial ang," a ti. A sawi chhunzawmnaah, "Kei leh ka miten kan tawrhna phuba la tur hi an la rawn piang dawn. Ka dam zel leh zel lohin awmzia a nei lo, mahse an phuba lakna tur chu an awm zel dawn a ni," a ti.

Kum thum liam ta khan Azam Khan hi court chuan inhuatna chawktho thei leh, ṭawngkam mawi lo taka hmanga thu a sawi avangin kum thum tang turin a lo hrem tawh a, Assembly member a nihna pawh paih sak a ni.

Complaint thehluttu zinga pakhat, Shahnaz chuan Azam Khan chu hmeichhiate chungchang mawi lo takin a sawi a ni tiin, hmeichhe zahna nei loah a puh. A thusawi dan chuan a rilru a tina hle a, hetiang zawng hian tumahin thu an sawi tur a ni lo, a ti. Complaint thetluttu dang, Aniza pawhin Azam Khan hian hmeichhiate chungchang hi ṭha takin a sawi ngai lo niin a sawi bawk.