J&K CM-in mi 4,327 thubuai titawp turin hriattir

Jammu and Kashmir Chief Minister Mehboob Mufti-i chuan security force-te lunga tawng vanga thubuai siamsak, ṭhalai 4,327 te thubuai chu tihtawpsak turin thupek a tichhuak.

Chief minister hian kum 2008-2014 inkara tualchhung mite leh security force te innawrna avanga security force-te lunga tawnga puha mi tam tak thubuai siamsak an nih chungchang chu a ennawn mek a ni. Director General of Police (DGP) SP Vaid-a kaihhruai, high-power committee in report a thehluh behchhanin, thubuai tihtawpsak tura thupek hi a tichhuak ta a ni.

Mehbooba Mufti-i hian chief minister dinhmun a chelh aṭanga thla hnih chhungin ṭhalai 634 te inhnamhnawihna thubuai 104 chu a lo titawp tawh a, thubuai dangte ngaihtuah chhunzawm zel a tumna chu tualchhung buaina leh tharum thawhna thleng vangin a bahhlah phah niin official chuan a sawi.

CM thupuangtu chuan chief minister thupeka thubuai tihtawp hi 848 a tling tawh tih a sawi a, hei hi mi 4,957 in an chhawr tawh a ni, a ti. CM hian high power committee hnenah kum 2015 aṭanga thubuai siamsakte chu ennawn vek turin a ngen a, panel hian report a la thehlut lo.

Mufti-i hian kar kalta khan lung-a intawng chungchang avanga a vawikhatna atana thubuai siamsakte chu hnuhkir leh vek an nih tur thu a lo sawi tawh a, he thutlukna hi sorkar laipui palai Dineshwar Sharma rawtna anga a siam a ni.

Nikum July thlaa security force-ten Hizbul Mujahideen commander Burhan Wani an kahhlum avanga tualchhung mite leh security force-te inkar buaina a chhuah hnuah, security force-te lunga tawnga beitu lakah hian thubuai 11,500 zet ziahluh a ni tawh a ni. Heng zinga thubuai 4,500 chuang chu thubuai siamsak an nih ṭum khatna an ni.