Nestle-in an puhna chhang let

Uttar Pradesha Shahjahanpur district-a food official-ten Nestle India siam, Maggi noodles-a ash content chu danin mihring ei chin tura a phal chin aia sang nia sawi chu chhang letin, Nestle India chuan Maggi siamah hian thil vap, ash hi an telh lo tih a sawi.

Shahjahanpur court chuan laboratory-a Maggi sample enchhin chuan test a patlang lo nia sawiin, hei vang hian Nestle India chu cheng nuai 45 chawi tur leh, Shahjahanpur-a distributor-te pawh cheng nuai 17 chawi turin a lo ti tawh a ni. Nestle India thupuangtu chuan thuchhuah siamin, Maggi noodle siamnaah hian thil vap engmah telh a ni lo tih a sawi.

Food regulator FSSAI chuan kum 2015 June thla khan Maggi noodles-a lead level chu danin a phal aia sang a nih avangin mihring ei atana him tawk lo tiin hralhchhuah a lo khap tawh a, Nestle pawhin an noodle pekchhuahte hi a lakkir leh vek a ni. Hemi kum November thla hian Bombay High Court-in a phut angte a tihpuitling hnuiah Maggi noodles hi hralhchhuah phalsak leh an ni.