Trump-an UK PM Theressa May-i a khak

UK Prime Minister Theresa May-i chuan US President Donald Trump chu far-right video a share avangin a sawisel a, hei hi chhang letin Trump chuan UK PM chu firfiakte pawikhawihna thleng ṭhin chungchang ngaihtuah zawk turin a ti.

Trump chuan a twitter-ah May-i khakna thu hi ziakin, "Keimah lam ngaihtuah loin, United Kingdom chhunga Islam firfiak ho pawikhawihna thlente ngaihtuah zawk rawh" a ti.

Donald Trump hian British far-right group in muslim dodalna lam video an post zinga pathum chu a twitter-ah a lo dahchhawng ve leh a ni.

Theresa May-i thupuangtu chuan President Trump-a thiltih chu president tih atan a dik lo tih a sawi. US leh UK hi ram inṭhianṭha tak niin, inzawmna bik tak an nei niin an sawi ṭhin a, Donald Trump lakluh a nih hnuah ram dang hruaitu zinga White House tlawh hmasa ber chu May-i hi a ni.

Trump-an a twitter-a video a share hi British far-right group, Britain First deputy leader, Jayada Fransen-in a post a ni. Kum 31 mi, Fransen-i hi Belfast-a rally neihnaa thu a sawiah ṭawngkam mawi lo leh midang vau zawnga thu sawia puh a nih vangin UK-ah hian thubuai siamsak a ni. Video an post zinga pakhatah hian Muslim mi pemlut pakhatin Dutch mi, tiang hawla kal pakhat kut a thlak lai a lang a, video pahnihnaah hian mi pakhatin Virgin Mary lim a vawchhe lai, 'Allah chauh chu biak leh chawimawi tur a ni' ti asawi lai a lang a, hei hi Syria rama thleng nia hriat a ni. Video pathumnaah hian kum 2013-a Egypt rama buaina thleng, Aelxandria-a in chung aṭanga mi pakhat an namthlak lai a lang bawk.