Sipai official hlui thiam loh chan tir

Argentina navy officer hlui Afredo Astiz leh Naval Mechanics School (Esma) member hlui ṭhenkhat chu kum 1976-1983 chhunga sipai rorela hnuaia an awm laiin eptu lam mi tam tak nghaisaa puhna thubuaia thiam loh chantir an ni.

Captain Afredo Astiz leh Jorge Eduardo Acosta-te politics lama an hmelama mi sangchuang nghaisak leh tihhlumnaa inhnawihah puhnaa thiam loh chantirin, dam chhung tang tura hrem an ni. Naval Mechanical School-a pawikhawihna thlen chungchangah hian mi 54 te chu thubuai siamsak an ni a, an zinga mi 29-te chu Nilaini khan damchhung tang tura hrem an ni a, mi 19 te chu kum 8-25 inkar tang tura tih niin, mi paruk erawh ngaihdam an ni thung.

Angel of death tia sawi ṭhin, Astiz chuan an thiltih chu left-wing firfiakte kut aṭanga Argentina mite chhanhimna tura ti an nih thu a sawi a, a thiltih avang hian thupha chawi a tum lo tih a sawi. A thubuai ngaihtuahnaah pawh human right organisation chu phuba lak tum pawl niin a puh. Astiz leh Acosta-te hi kum 2011 khan thubuai dangah damchhung tang tura hrem an lo ni tawh bawk.

Kum 1976-a General Jorge Rafael-a kaihhruai sipaiin Argentina rama ro an rel chhung khan mi 30,000 vel tihhlum nia sawi a ni. Esma chu innghaisakna hmun lian ber a ni a, kum 2004 khan rights museum-ah siam zui a ni. Sipai rorelna hnuaia kum riat an awm chhung khan Esma-ah hian mi tang 5,000 vel an awm hman a, an zinga 90% chu an thi a ni. A tam zawk chu firing squad-ten an kaphlum a, ṭhenkhat chu damdawi-a hrai ruiin thlawhtheihna aṭangin Atlantic tuifinriatah namthlak a ni.